KE publikon nesër raportin për statusin kandidat

Dokumenti pritet t’u rekomandojë 28 vendeve anëtare dhënien e tij për Shqipërinë. Ambasadori italian: E meritoni plotësisht

Fatjona Mejdini

Komisioni Europian do të publikojë nesër raport-progresin për Shqipërinë, i cili pritet t’u rekomandojë vendeve anëtare të unionit dhënien e statusit kandidat për vendin tonë. Burime diplomatike bëjnë të ditur se ashtu si në dhjetorin e kaluar, KE do t’u kërkojë 28 vendeve të Bashkimit Europian dhënien e këtij statusi për Shqipërinë, pas tre herë dështimesh radhazi në këtë kërkesë. Ky raport do t’i dorëzohet palës shqiptare nga komisioneri për Zgjerim, Stefan Fyle, i cili në datën 4 qershor do të vizitojë Tiranën për të vijuar takimin e nivelit të lartë mes palës shqiptare dhe asaj të BE-së. Ndërkaq, dje ambasadori italian në Tiranë, Massimo Gaiani, tha se Shqipëria e meriton statusin në Bashkimin Europian dhe se ka shpresa të mira që kjo të ndodhë në fundin e këtij muaji. Ai shprehu mbështetjen e Italisë në këtë proces dhe theksoi se pavarësisht vonesave në të shkuarën, Shqipëria do të arrinte ta kapte shumë shpejt këtë stacion në rrugën e gjatë të integrimit në Bashkimin Europian.

Vendimi

Kryeministri Edi Rama, në mënyrë të vazhdueshme ka kërkuar që Këshilli i Ministrave të 28 vendeve anëtare të Bashkimit Europian të vlerësojë dhënien e statusit kandidat për Shqipërinë mbi bazën e progres-raportit të Komisionit Europian. Kjo, sepse sipas Ramës, ky raport tregon më së miri progresin real që ka bërë Shqipëria në lidhje me pesë prioritet e lëna detyrë për t’u përmbushur në këmbim të integrimit. Ky qëndrim i Ramës duket se vjen në një kohë kur siguria e qeverisë shqiptare për sa i përket rekomandimit për dhënien e statusit të vendit kandidat nga ana e Komisionit Europian është e madhe. Raporti do të publikohet nesër në Bruksel dhe ai do të dorëzohet nga vetë komisioneri për Zgjerim në Komisionin Europian, Stefan Fyle. Në këmbim të këtij raporti, Fyle do të marrë nga pala shqiptare dhe udhërrëfyesin i miratuar nga qeveria shqiptare një javë më parë, i cili detajon hapat që ekzekutivi, por edhe pushtetet e tjera do të ndjekin për sa i përket plotësimit të pesë prioriteteve. Po kështu, burimet bëjnë të ditur se Fyles do t’i dorëzohet dhe një platformë e veçantë antikorrupsion, e cila do të shprehë zotimin e plotë të qeverisë shqiptare në luftën kundër këtij fenomeni që konsiderohet ende problematik për Shqipërinë.

Italia

Ambasadori italian, Massimo Gaiani, u shpreh dje optimist për sa i përket marrjes së statusit të vendit kandidat nga ana e Shqipërisë në fundin e këtij muaji. Gjatë një aktiviteti të organizuar në Fier, me rastin e javës kombëtare të Italisë, ambasadori Massimo Gaiani tha se Shqipëria e ka merituar prej kohësh statusin kandidat në BE. “Jemi në muajin kur do të merret vendimi për statusin. Pavarësisht vonesës, Shqipëria do ta marrë statusin. Italia do të vijojë ta mbështesë Shqipërinë”, deklaroi ambasadori Gaiani.

“Lufta” me euroskeptikët

Fillimi i qershorit, intensiv për diplomacinë shqiptare

Kryeministri Edi Rama dhe ministrat e linjës për sa i përket çështjes së integrimit, ai i Jashtëm, Ditmir Bushati dhe e Integrimit, Klajda Gjosha, do të vijojnë turin e tyre diplomatik në vendet euroskeptike, si Britania e Madhe dhe Franca. Kështu, Gjosha në datë 10 do të jetë për takime zyrtare në Londër në kuadër të paraqitjes së progresit të bërë nga Shqipëria këta muaj. Më pas ajo do të ndalet në Holandë, për të zhvilluar dhe aty takime me sfond nevojën e vendit për të marrë këtë status. Nga ana tjetër, më datë 12, Kryeministri Rama i shoqëruar nga dy ministrat do të zhvillojë një vizitë në Francë, ku pritet dhe një takim me Presidentin e këtij vendi, Fransua Holande.